Ош областында көчмө лекциялар
Кыргыз Республикасынын Улуттук банкынын Ош областтык башкармалыгынын кызматкерлери «Дүйнөлүк каражат топтоо күнү–2026» иш-чарасын өткөрүүнүн алкагында 2026-жылдын 27-октябрынан 30-октябрына чейин көчмө лекцияларды өткөрдү.
Көчмө лекцияларга Өзгөн районунун Куршаб айылындагы Ы. Бектемиров атындагы №2, Кара-Суу районунун Кара-Сөгөт айылынын О. Кожошев атындагы №32, Ош шаарынын Ноокат районундагы Найман атындагы жана Ишкаван айылынын К. Маткеримов атындагы №62 жалпы орто билим берүү мектептеринин окуучулары катышты.
Лекциянын жүрүшүндө улуттук валютанын өнүгүү жолу менен коргоо элементтери, QR-код аркылуу төлөм жүргүзүү, ошондой эле кредит, депозит жана каражат топтоо боюнча маалымат берилди. Мында, жаштардын финансылык алдамчылыкка тартылуусунун алдын алуу маселесине өзгөчө көңүл бурулду.
Ош мамлекеттик университетинин Бизнес жана менеджмент факультетинин 2-курсунун студенттери үчүн Ош областтык башкармалыгынын нумизматикалык музейинде ачык эшик күнү уюштурулду. Анда улуттук валютанын өнүгүү жолу, анын коргоо элементтери, кредиттөө жана аманат боюнча лекциялар окулду.
Мындан тышкары, Ош шаарындагы В.В. Терешкова атындагы №11 мектеп- интернаттын 9-классынын окуучулары үчүн акча каражаттарын үнөмдөө темасында интерактивдүү оюн өткөрүлдү.
«Дүйнөлүк каражат топтоо-2026» иш-чарасына 400гө жакын адам катышты.
Басып чыгарууга 
